سالار سەرحەد لێپرسراوی بۆردی پەیوەندییە کوردستانییەکانی یەکێتی بە میدیای فەرمی حزبەکەی وتووە "بە ئامادەبوونی بافڵ جەلال تاڵەبانی سەرۆکی یەکێتیی نیشتمانیی کوردستان، یەکێتی بانگھێشتی کەسی یەکەمی سەرجەم حزب و پارتە سیاسییەکانی ھەرێمی کوردستانی کردووە بۆ کۆبوونەوە و گفتوگۆکردن لەبارەی بارودۆخی ھەرێمی کوردستان".

دەشڵێت "تەوەرێکی دیکەی کۆبوونەوەکە گفتوگۆ دەبێت لەسەر کێشە ھەڵپەسێردراوەکانی نێوان ھەرێم و عیراق،  یەکێتی دەیەوێت کۆدەنگی لایەنەکانی ھەرێمی کوردستان دروستبکات بۆ چارەسەری کێشەکان بەپێی دەستوور و لەسەر بەرژەوەندی گشتی". 

لێپرسراوی بۆردی پەیوەندییە کوردستانییەکانی یەکێتیی روونیکردەوە "یەکێتی لەم کۆبوونەوەیەدا کەسی یەکەمی سەرجەم حزب و پارتە سیاسییەکانی بەبێ رەچاوکردنی ژمارەی کورسی و لەسەر بنەمای یەکدەنگی ھاوبەش بۆ پرسە نیشتمانییەکان بانگھێشتکردووە".

ئاماژەی بەوەش کرد "بانگھێشتنامەی کۆبوونەوەکە لەلایەن مەکتەبی پەیوەندییەکانی یەکێتیی نیشتمانیی کوردستانەوە ئاڕاستەی کەسی یەکەمی حزب و پارتە سیاسییەکانی ھەرێمی کوردستان کراوەو بڕیارە سەعات ١١ی پێشنیوەڕۆی سبەینێ (پێنجشەممە، ٢٤ی تشرینی دووەمی ٢٠٢٢) لە ھاوینەھەواری دوکان ئەنجام بدرێت.

پێشتر ماڵپەری پۆڵەتیک لە راپۆرتێکدا بڵاوی کردەوە " "بافڵ تاڵەبانی سەرکردەی لایەنە سیاسیەکان (جگە پارتی) لە ھاوینەھەواری دوکان کۆدەکاتەوە، تاوەکو پێیان بڵێ ھەرشتێک ڕووبدات ھۆکارەکەی پارتییە و ئیتر ڕێگە نادەن دۆخی خزمەتگوزاریی و ژیانی خەڵک لە زۆنی سەوز وەک ئێستا بمێنێتەوە"‌.

ئاماژە بەوەش کراوە "لە کۆبوونەوەکەدا، بافڵ تاڵەبانی ئاماژە دەدات بە دانوستان و لێکتێگەیشتنەکانی لەگەڵ حکومەتی عێراق، کە سەرەکیترینیان ئەوەیە یەکێتی مەرزەکانی سنوری خۆی دەخاتەژێر دەستی حکومەتی عێراقییەوە و لە بەرامبەریشدا بەغدا بودجە و خزمەتگوزاریی تەواو بۆ زۆنی سەوز دابین دەکات، بەوەش سلێمانی لە سزا و گەمارۆی ئابوریی و دارایی و سیاسی پارتی ڕزگار دەکات".

ماڵپەرەکە بەدووی نازانێت کە بافڵ تاڵەبانی بڕیاری خۆی دابێت و ھیچ حسابێک بۆ پارتی نەکات و تەنھا وەک ئیحترامێکیش سەرکردەی حزبەکانی تر کۆبکاتەوە و ڕاوێژ و سەرنجیان وەربگرێت.