سەردێڕ:
سەرەکی  |   دەربارە  |   پەیوەندی  |  
زێدنیوز
کوردستان

سه‌رۆكی هه‌رێم پیرۆزبایی له‌ مه‌سرور بارزانی ده‌كات..شایستەی ئەم بەرپرسیاریه‌تی و متمانەیەن

زێد نیوز:

نێچیرڤان بارزانی، سه‌رۆكی هه‌رێمی كوردستان پیرۆزباینامه‌یه‌كی ئاراسته‌ی مه‌سرور بارزانی سه‌رۆكی حكومه‌تی هه‌رێمی كوردستان كرد به‌بۆنه‌ی پێدانی متمانه‌ی په‌رله‌مانی كوردستان به‌ كابینه‌ی نوێی حكومه‌تی هه‌رێمی كوردستان.


له‌ پیرۆزباینامه‌كه‌ی سه‌رۆكی هه‌رێمی كوردستاندا، مه‌سرور بارزانی به‌ شایسته‌ی ئه‌و به‌رپرسیارێتی و متمانه‌یه‌ زانیوه‌ و دڵنیایی خۆشی نیشانداوه‌ كه‌ ئەوپەڕی توانای خۆیان و تیمەكەیان دەخەنەگەڕ بۆ خزمەتكردنی هەرێمی كوردستان. 

هیوای ئه‌وه‌شی خواستوه‌ كه‌ كابینه‌ نوێكه‌ی حكومه‌تی هه‌رێم رووبه‌ڕووی ئه‌و سه‌ختیانه‌ نه‌بنه‌وه‌ كه‌ كابینه‌ی پێشوو رووبه‌ڕووی بوه‌وه‌. 


دەقی پیرۆزباییەکەی نێچیرڤان بارزانی بۆ مەسرور بارزانی

به‌ڕێز مه‌سروور بارزانی‌،
سەرۆ‌ك وەزیرانی هەرێمی كوردستان

سڵاو و ڕێز..

خۆشحاڵم كە ئەمڕۆ پەرلەمانی هەرێمی كوردستان متمانه‌ی‌ دا به‌ به‌ڕێزتان وەك سەرۆ‌ك وەزیران و به‌ كابینەی نۆیەمی‌ حكوومه‌تی‌ هه‌رێمی‌ كوردستان. بەو بۆنەیەوە بەگەرمی پیرۆزبایتان لێدەكەم.

ئەمە دەستكەوتێكی دیكەی بەردەوامبوونی پرۆسەی گەشەپێدان و قووڵكردنەوەی دیموكراسییە لە هەرێمی كوردستان، لە ئەنجامی ویست و خۆڕاگری و هاوكاریی هاووڵاتیان و لایه‌نه‌ كوردستانییه‌كان و دۆست و پشتیوانانی گەلەكەمان.

ئێوە شایستەی ئەم بەرپرسیاریه‌تی و متمانەیەن، دڵنیام ئەوپەڕی توانای خۆتان و تیمەكەتان دەخەنەگەڕ بۆ خزمەتكردنی هەرێمی كوردستان. ئەزموونی چەند ساڵەی كاركردنمان بۆ پاراستن و پێشخستنی دۆزی گەلەكەمان و پیادەكردنی مافە دەستوورییەكانی هەرێمی كوردستان، بە زۆر قۆناغی هەستیار و سەختدا تێپەڕی، هیوادارم ئەو سەختیانە نەبینینەوە و هەموو تواناكان بۆ ئاوەدانكردنەوە و پێشكەوتنی زیاتری كوردستان تەرخان بكەین.

دڵنیام ئێوە لێهاتووانە، چالاك و كارا بەسەر گرفتەكاندا زاڵ دەبن، ورەی تیمەكەتان بەرامبەر تەحەددییەكان بەرز دەكەنەوە و ئەنجامی باش و خوازراو بەدەستدەهێنن. هیچتان درێخی ناكەن لە ئەرك و جێبەجێكردنی كاری ڕۆژانە و درێژخایەن بۆ درێژەدان بە دابینكردنی ئارامی، ئاسایش، گەشەی ئابووری، كۆمەڵایەتی و سیاسیی هەرێمی كوردستان.

گەلی كوردستان و بەڕێزتان و كابینەی نۆیەمی حكوومەتی هەرێمی كوردستان دڵنیا دەكەمه‌وه‌ كە وەك سەرۆكی هەرێمی كوردستان بەو‌پەڕی تواناوە پشتیوانی و هاوكاریی سەركەوتنی كاری ئێوە و كابینەی نۆیەمی حكوومەت دەكەم.

سەركەوتنی ئێوە و جێگری سەرۆك وەزیران و تەواوی وەزیرەكان بۆ خزمەتكردنی هەرێمی كوردستان، سەركەوتنی هەموومان و سەركەوتنی گەل و هەرێمی كوردستانە.

 لەگەڵ ڕێزمدا..

نێچیرڤان بارزانی
سەرۆكی هەرێمی كوردستان
10/7/2019



ئه‌م بابه‌ته   ‌ جار خوێندراوه‌ته‌وه‌
2019-07-10
زیاتر...
سەرەکی  |   دەربارە  |   پەیوەندی  |  
Telerik For IT Solution

© Copyright 2018 ZEDNEWS. All Rights Reserved.

         E-Mail: [email protected]