سەردێڕ:
سەرەکی  |   دەربارە  |   پەیوەندی  |  
زێدنیوز
ڕاپۆرت

پارتی و یەکێتی لە بانگەشە و بەڵێنەکانیان بە هاووڵاتیان راستگۆ نەبوون

زێد نیوز:

پارتی دیموکراتی کوردستان و یەکێتی نیشتیمانی کوردستان لەو بەڵێن و پەیمانانەی کە لە هەڵمەتی هەڵبژاردنی پەرلەمانی کوردستاندا لە ساڵی 2018 بە خەڵکی کوردستان و هاووڵاتیانیاندا راستگۆ نەبوون و لە یەکەم تاقیکردنەوەیاندا شکستیانهێنا و لەجێی متمانەی خەڵک نەبوون.


رۆژی (16ی کانونی دووەمی 2020)  لە دانیشتنی ئاسایی پەرلەمانی کوردستاندا یاسای چاکسازی خرایە دەنگدان و لەگەڵ ئەوەی ناڕەزایەتییەکی زۆر لەسەر پڕۆژە یاساکە هەبوو بەتایبەت لەلایەن فراکسیۆنەکانی نەوەی نوێ و یەکگرتوو و کۆمەڵی ئیسلامی و یاساکەیان وەک یاسایەک بۆ پاراستنی بەرژەوەندی پەرلەمانتار و پلە باڵاکان ناوبرد و هۆڵی پەرلەمانیان جێهێشت، بەڵام لەلایەن پەرلەمانتارانی پارتی و یەکێتی و گۆڕان و پێکهاتەکان یاساکە تێپەڕێندرا. 

لە پرۆژە یاساکەدا دەنگ بە خانەنشینکردنی پەرلەمانتار و پلە باڵاکان درا و هیچ بڕگە و مادەیەک بۆ گەراندنەوەی موچە پاشەکەوتکراوەکانی موچەخۆرانی هەرێمی کوردستان جێگیر نەکرا کە لە ماوەی چەند ساڵی رابردووی شەڕی داعشدا حکومەتی هەرێمی کوردستان بەبیانووی قەیرانی دارایی لە موچەخۆرانی کوردستانی بڕی بوو. 

هەروەها لە پڕۆژە یاساکەدا هیچ بودجەیەک بۆ دامەزراندنی دەرچووە دانەمەزراوەکانی پەیمانگە و زانکۆکانی هەرێمی کوردستان تەرخان نەکرا کە چەند سالێکە داوای دامەزراندن دەکەن و دەسەڵاتداران هەر جارەی بە بیانوویەک داواکانیان پشتگوێ دەخەن و بەر لە دانیشتنی پەرلەمانی کوردستان لەو رۆژەدا لە شار و شارۆچکەکانی کوردستان خۆپیشاندانیان ئەنجامدا. 

هاوکات لە پڕۆژەکەدا کەمترین موچەی خانەنشینی لە هەرێمی کوردستان دیاری نەکرا کە فراکسیۆنی نەوەی نوێ و فراکسیۆنەکانی یەکگرتوو و کۆمەڵ داوایان دەکرد کەمترین موچەی خانەنشینی لە هەرێمی کوردستان لە 500 هەزار دینار کەمتر نەبێت. 

لە بەدواداچونێکی زێد نیوز بۆ دروشم و بەڵێنەکانی پارتی و یەکێتی لە هەڵمەتی هەڵبژاردنی 30ی ئەیلولی 2018دا دەردەکەوێت کە ئەو دوو پارتە بەڵێنی چاکسازی دارایی و دامەزراندنی دەرچووە دانەمەزراوەکانی پەیمانگە و زانکۆکانی کوردستان و رەخساندنی هەلیکار دەکەن و جەختیان لەسەر کەمکردنەوە و نەهێشتنی خانەنشینی پەرلەمانتار و پلە باڵاکان کردۆتەوە بەڵام لە یەکەم تاقیکردنەوەیاندا لەبەردەم ویژدانی گەل و هاووڵاتیانی کوردستان شکستیان خوارد. 

لەگرتەیەکی ڤیدیۆیدا لەساتی هەڵمەتی بانگەشەکەدا هێمن هەورامی، سەرۆکی لیستی پارتی بۆ پەرلەمانی کوردستان دەڵێت "گەنجانی کوردستان ئایندەیان لە کوردستانێکی بەهێزدایە، پارتی بۆ ئەوان کار دەکات تا خەرجییە گشتییەکانی حکومەت کەم بکاتەوە بۆ رەخساندنی هەلی کاری زیاتر".  
هەورامی ئاماژە بۆ ئەوەش دەکات برەو بە ستراتیژی پێدانی قەرزی بچوک دەدەن بەڵام ئەوەی بیر نییە کە لە قەیرانی دارایدا حکومەتی هەرێمی کوردستان دەستی برد بۆ بەکارهێنانی پارەی هەموو سندوقەکان و لەئێستاشدا سندوقی قەرزی بچوک بەتاڵە. 

هاوکات قوباد تاڵەبانی، سەرۆکی لیستی یەکێتی  بۆ پەرلەمانی کوردستان لەوتارێکدا باس لە هەلی کار و زیادبوونی رێژەی بێکاری لە ناو گەنجانی کوردستان دەکات و دەڵێت ئەمە دەرفەتە بۆ ئەوەی کە بگەن بە کوردستانێک کە شایستە بێت بۆ ژیانی گەنجان و هاووڵاتیان و زیادکردنی هەلی کار و باشترکردنی خزمەتگوزارییەکان.

وتەی نێو هەڵمەتەکانی قوباد تاڵەبانی لە کاتێکدا بوو کە مانگێک بەر لە هەڵمەتی هەڵبژاردنەکان لە میانەی بڵاوکردنەوەی تویتێک وتی "ئەگەر خوێندکاربومایە دەچوم ئیشێکم دەدۆزییەوە کە لەبواری خۆم نەبێ. چییە وا ئەزانیت هەر لەبەرئەوەی شەهادەیەکت هەیە هەندێک ئیش لەئاستی تۆ نییە؟ بڕۆ لە مەتعەمێک، لە ئوتیلێک، لە دوکانێک لە مۆڵێک لە مۆڵەکان کار بکە" ئەوەش ناڕەزایەتییەکی زۆری لەناو گەنجان و دەرچووە دانەمەزراوەکان لێکەوتەوە.  
وتەی بەرپرسانی پارتی و یەکێتی لە بانگەشەی هەڵمەتەکانی هەڵبژاردن لە کاتێکدا بەبیردەهێنینەوە کە لە ئێستادا و دوای ساڵ و نیوێک لە ئەنجامدانی هەڵبژاردنی پەرلەمانی کوردستان خزمەتگوزارییەکانی خەڵکی کوردستان لەو پەڕی خراپیدایە و رۆژانە چەند کاتژمێرێکی کەم کارەبای نیشتیمانی دەدرێت و لەم وەرزی زستانەدا هێشتا هاووڵاتییەکی زۆری کوردستان نەوتی سپییان پێنەدراوە و لە مانگی کانوونی دووەمی 2020 داین و موچەی مانگی 10ی ساڵی پار دەدرێت. 
هاوکات رۆژی 11ی1ی2020  چەند گەنجێکی ئەم هەرێمەی کوردستان بەهۆی بێکاری و نەبوونی ژیانێکی شایستە کە سەرکردەکانی ئەو دوو پارتە لە بانگەشەی هەڵبژاردندا بەڵێن و پەیمانیان بۆ دابینکردنی دەدا، رێگەی ئەوروپایان گرتە بەر و لە دورگەی پاکسوسی یۆناندا بەشێکیان گیانیان لەدەستدا و هەندێکیشیان تا ئێستا بێسەر و شوێنن. 


ئه‌م بابه‌ته   ‌ جار خوێندراوه‌ته‌وه‌
2020-02-07
زیاتر...
سەرەکی  |   دەربارە  |   پەیوەندی  |  
Telerik For IT Solution

© Copyright 2018 ZEDNEWS. All Rights Reserved.

         E-Mail: [email protected]