سەردێڕ:
سەرەکی  |   دەربارە  |   پەیوەندی  |  
زێدنیوز
ڕاپۆرت

ئەمڕۆ لە پەرلەمان چی روویدا و یاسای چاکسازی چۆن پەسەندکرا؟

زێد نیوز:

ئەمڕۆ (پێنجشەممە)، پەرلەمانی کوردستان دانیشتنێکی ئاسایی بۆ پەسەندکردنی پڕۆژە یاسای چاکسازی ئەنجامدا و پڕۆژەکە بەدەنگی پەرلەمانتارانی پارتی و یەکێتی و گۆڕان و پێکهاتەکان پەسەندکرا و هەریەک لە فراکسیۆنەکانی نەوەی نوێ و یەکگرتوو و کۆمەڵ دەنگیان پێ نەدا و هۆڵی پەرلەمانیان بەجێهێشت.


لەسەرەتای کۆبونەوەکەدا و لەگەڵ خوێندنەوەی ئەو پێشنیارانەی کە بۆ بڕگە و مادەکانی پڕۆژە یاسایی چاکسازی خرابووە ڕوو و خرایە دەنگدانەوە، ئەندامانی فراکسیۆنی نەوەی نوێ رەخنەی ئەوەیان گرت لەلایەن لیژنەکەوە پێشنیارەکانی ئەوان کە پشتگیری یاسایشیان هەبووە نەخراوەتە ناو پیشنیارەکان و فەرامۆش کراوە و لەو بارەیەوە هەریەک لە د.کازم فاروق، سەرۆکی فراکسیۆنی نەوەی نوێ و مژدە مەحمود پەرلەمانتاری فراکسیۆنی نەوەی نوێ رەخنەیان لەو پشتگوێخستنە گرت و ئاماژەیان بەوە کرد پەرلەمان بەگوێرەی خواست و داواکاری حکومەتی هەرێم یاساکەی داڕشتووە نەک لە خزمەتی خەڵکی هەژار و کەمدەرامەت. 

هاوکات فراکسیۆنەکانی یەکگرتوو و کۆمەڵیش هاوشێوەی نەوەی نوێ ڕەخنەیان لەوە گرت پێشنیارەکانیان بۆ بڕگە و مادەکانی پڕۆژەکە نەخراوەتە ناو پێشنیارەکان و پشتگوێخراوون. 

یەکێک لەو مادانه‌ی كه‌ گفتوگۆی زۆری له‌باره‌وه‌ كرا بابه‌تی خانه‌نشینكردنی پله‌ باڵاكان بوو، جگە لەوەی پێشنیارەکانی فراکسیۆنەکانی نەوەی نوێ و یەکگرتوو و کۆمەڵ نەخوێنرایەوە لەگەڵ ئەوەشدا مادەکە بە دەنگی پەرلەمانتارانی پارتی و یەکێتی و گۆڕان و پێکهاتەکان تێپەڕێنرا. 
پەسەندکردنی موچەی خانەنشینی گرژی و پشێوی لەناو هۆڵی پەرلەمان لێکەوتەوە و بەهۆیەوە پەخشی ڕاستەوخۆی پەرلەمان بڕا. 

بەگوێرەی گرتەیەکی ڤیدیۆیش کە دەست زێد نیوز کەوتووە و لەکاتی راگرتنی پەخشی راستەوخۆی پەرلەماندا تۆمارکراوە، ئەندامانی فراکسیۆنی نەوەی نوێ ڕەخنە لە پەسەندکردنی بڕینەوەی خانەنشینی بۆ پەرلەمانتار و پلە باڵاکان دەگرن و تیایدا دەنگی د.کازم فاروق، سەرۆکی فراکسیۆنەکە دەبیسترێت کە هەستاوەتە سەرپێ و دەڵێت " ئەوە نادادپەروەرییە و بڕینەوەی موچەی خانەنشینی بۆ پەرلەمانتار و پلە باڵا نادادپەروەرییە و موچە بۆ پلە باڵاکان دەبڕنەوە بەڵام بۆ خەڵکە هەژارەکە موچە نابڕنەوە". 

دکتۆر کازم فاروق دەشڵێت "دانیشتن لەمەجلیسی ئاوا هەر عەیبەیە". 

هاوکات ئەندامانی فراکسیۆنەکە وێنەی ئەو گەنجانە بڵاودەکەنەوە کە لەبەر نادادپەروەری و ستەمی دەسەڵاتدارانی کوردستان و بێکاری سەری خۆیان هەڵگرت و رێگەی هەندەرانیان گرتەبەر و لە ئاوەکانی وڵاتی یۆناندا گیانیان لەدەستدا. 

لەگرتە ڤیدیۆییەکەدا، مژدە مەحمود، پەرلەمانتاری فراکسیۆنی نەوەی نوێ دەڵێت "خەڵک لە پرسەی کوڕەکانیانە کە لە ئاوی یۆنادا گیانیان لەدەستدا و ئێوەش موچەی خانەنشینی بۆ پەرلەمانتار و پلە باڵاکان دەبڕنەوە، وەڵا ئەمە ستەم و زوڵمە". 
هاواریش دەکەن "نەخێر بۆ بڕینەوەی موچەی خانەنشینی پلە باڵاکان و نەخێر بۆ پیشێلکردنی پەیڕەوی ناوخۆی پەرلەمان".. دواتر فراکسیۆنی نەوەی نوێ هۆڵی پەرلەمان جێدەهێڵن و لەدوای ئەوانیش هەریەک لە فراکسیۆنەکانی یەکگرتوو و کۆمەڵی ئیسلامی هۆڵەکە جێدەهێلن. 

تاکە ئەندامێکی فراکسیۆنی نەوەی نوێ کە لە هۆڵەکەدا مایەوە و دەنگی بە بڕینەوەی موچەی خانەنشینی پەرلەمانتار و پلەباڵاکاندا، شادی نەوزاد بوو. کە بەگوێرەی نوسراوێک کە وێنەیەکی دەست زێد نیوز کەوتووە، شادی نەوزاد بەر لەوەی ببێتە پەرلەمانتار بەڵێننامەیەکی واژۆکردبوو کە پەیوەست بێت بە پرەنسیپەکانی جوڵانەوەی نەوەی نوێ و دژی خانەنشینکردنی پەرلەمانتار و پلە باڵاکان بێت بەڵام بە پێچەوانەی بەڵێننامەکەی دەنگیدا. 

بەهۆی دەنگدانی بە خانەشینی پەرلەمانتار و پلە باڵاکان و دەرچوون لە پرەنسیپەکانی کاری فراکسیۆنەکە لە پەرلەمانی کوردستان، ئەنجومەنی باڵای جوڵانەوەی نوێ بڕیاریدا، شادی نەوزاد لە جوڵانەوەکە و فراکسیۆنەکەی دەربکات و لەراکەیەندراوێکدا ئاماژەیان بەوە کرد "لەم جوڵانەوەیەدا مرۆڤی بەرژەوەندخواز و خۆپەرست جێگای نابێتەوە". 

لەراگەیەندراوەکەدا رونکراوەتەوە "پەرلەمانتارێک کە بە دەنگی جوڵانەوەکە و سەرۆکی جوڵانەوەکە بووە بە پەرلەمانتار و تەنها 500 دەنگی هێنابوو، ئەمرۆ پێچەوانەی سیاسەت و ستراتیژی جوڵانەوەکە خیانەتی لە خودا و لە سوێندەکەی و لە دەنگدەران و هاوڵاتییان کرد، پەرلەمانتار (شادی نەوزاد) دەنگیدا بە خانەنشینیی پەرلەمانتاران و پلە باڵاکان".

هاوکات شاسوار عەبدولواحید، سەرۆکی جوڵانەوەی نەوەی نوێ راگەیەندراوێکی بڵاوکردەوە و ئاماژەی بەوە کرد "باسکردنی رەتکردنەوەی موچەی خانەنشینی لەلای نەوەی نوێ شتێکی تازە نییە و لە هەڵمەتی بانگەشەی هەڵبژاردنەوە باسیان کردووە و تەنانەت لە 15ی8ی2018 لەو بارەیەوە هەموو کاندیدەکانی لیستی نەوەی نوێ  بەڵێننامەیان پێ واژۆ کرا."

دەشڵێت "ئەوەی درۆ لەگەڵ خودا، لەگەڵ میللەت، لەگەڵ دەنگدەران، لەگەڵ ئێمە بکات، ئەوا لەم جوڵانەوەیەدا جێی نابێتەوەو شوێنی زبڵدانی مێژوو دەبێت،نەک جوڵانەوەیەکی خاوەن ئەخلاق و خاوەن پرەنسیپ".

دەشڵێت "گرنگ ئەوەیە ئێمە و جوڵانەوەکە و فراکسیۆنەکە، راستگۆبوین لەگەڵ هاوڵاتییان و دەنگدەراندا.وە دڵنیایی ئەوە دەدات کە بەردەوام  دەبن لەسەر ئەم ڕێگایە."



ئه‌م بابه‌ته   ‌ جار خوێندراوه‌ته‌وه‌
2020-02-07
زیاتر...


سەرەکی  |   دەربارە  |   پەیوەندی  |  
Telerik For IT Solution

© Copyright 2018 ZEDNEWS. All Rights Reserved.

         E-Mail: [email protected]