سەردێڕ:
سەرەکی  |   دەربارە  |   پەیوەندی  |  
زێدنیوز
ڕاپۆرت

ئابڕوچوونێکی تر لە دۆسیەی نەوتی هەرێمی کوردستان دەردەکەوێت

زێد نیوز:

شارەزایەکی بواری نەوت بەناوی سایمۆن واتکینز لەڕێگەی ماڵپەری "ئۆیل پرایس" راپۆرتێکی لەبارەی ئابڕوچونێکی نوێی دۆسییەی نەوتی هەرێم لەژێر دەسەڵاتی ئاشتی هەورامیدا بڵاوکردەوە و ئاماژەی بەوەکرد، سکاڵایەک لە دژی حکومەتی هەرێمی کوردستان و ئاشتی هەورامی تۆمارکراوە کە حکومەتی هەرێم ناچار دەکات بڕی یەک ملیار و 600 ملیۆن دۆلار ببژێرێت.


واتکینز لە سەرەتای ڕاپۆرتەکەی ئاماژەی بەوەکردووە "وای لێھاتوە مانگێک تێناپەڕێت بەبێ دەرکەوتنی دۆسیەیەکی ئابڕوبەرانەی حکومەتی عێراق و هەرێمی کوردستان لە بواری نەوتدا". 

دەشڵێت، ھیچ شتێکی سەیر نیە کە عێراق یەکێک بێت لە خراپترین وڵاتەکانی جیھان لەڕوی بەرتیل وەرگرتن و گەندەڵیەوە.

سایمۆن واتکینز ئاماژەی بەوەکرد نوێترین دۆسیەی ئابڕوبەری نەوت لە هەرێمی کوردستان و عێراق ئەوەیە کە، کۆمپانیای دینستی بۆ بازرگانی نەوت و غاز داوایەکی لەدژی حکومەتی ھەرێمی کوردستان و  ئاشتی هەورامی، وەزیری پێشووی سامانە سروشتییەکانی هەرێمی کوردستان تۆمارکردووە. 


ئەو شارەزایەی بواری نەوت روونیکردەوە، داواکە لە ١٤/٨/٢٠١٩ پێشکەشی  دادگای دادوەری شاھانەی بەریتانیا کراوە، کە  داواکە حکومەتی هەرێم و  ئاشتی هەورامی تۆمەتبار دەکات بە پیلانگێڕی و زیانگەیاندن بە کۆمپانیاکە بە هۆکاری نایاسایی زۆر. 

واتکنز هۆکاری تۆمارکردنی داوا یاساییەکە دژی ئاشتی هەورامی، رووندەکاتەوە و دەڵێت "بۆیە داوا یاساییەکە دژی ئاشتی هەورامی تۆمارکراوە چونکە بەگوێرەی تێڕوانینی کۆمپانیا بەریتانییەکە ئاشتی هەورامی سەرۆکایەتی ئەو هەڵمەتەی کردووە کە بۆ لەکەدارکردنی (دینستی) بەڕێوەی دەبرد و کۆمپانیاکە بەرتیلدان بە ئاشتی هەورامی رەتکردۆتەوە لەپێناوی ئەنجامدانی گرێبەستێک لەگەڵ کۆمپانیای ریبسۆڵ-ی ئیسپانی بۆ نەوت. بەگوێرەی گرێبەستەکە دەبوو دینستی بەشی ریبسۆڵ لە سەرمایەی کۆمپانیای تالیسمانی کەنەدی بکڕێت بەگوێرەی گریبەستێکی ئاسایی. 

هەر بەگوێرەی ڕاپۆرتەکە داوا لە کۆمپانیای دینستی کراوە کە بڕە پارەیەک بەڕێگایەکی نایاسایی بخاتە سەر حسابێکی بانکیی، کە دواتر دەرکەوتووە حسابە بانکییەکە بەناوی ئاشتی ھەورامییەوەیە کاتێکیش کۆمپانیاکە وتوێتی کە ئەوان ئەو بڕە پارەیە نادەن ڕوبەڕوی چەندین ھەڕەشە بوونەتەوە و  ئەوەش لەبەر ئەوەی ئاشتی ھەورامی ھیچی بەدەست نەھێناوە لەو گرێبەستە.

لە ڕاپۆرتەکەدا باس لەوەکراوە، لەو ماوەیەدا ئاشتی ھەورامی بنەماڵەی بارزانی لەوە دڵنیا کردۆتەوە کە دۆسیەکە کۆتایی پێھاتوە و ئەو داوایە تەواو بووە، دواتر ویستویەتی ڕێگەیەکی دیکە بەکاربهێنێت بۆ دەربازبوون لە دۆسییەکە و گفتوگۆ یاساییەکانی دواخستووە و  داوای پێشکەش کردوە کە دۆسیەکە لە لەندەنەوە بگوازرێتەوە بۆ جێگەیەکی دیکە کە پشتی حکومەتی ھەرێمی کوردستان و ئاشتی ھەورامی بگرێت، بەڵام داواکە ڕەتکراوەتەوە.

بەگوێرەی راپۆرتەکەی ئۆویل برایس، داوایاساییەکەی دینستی کە ئاراستەی دادگای دادوەری شاری لەندەن کراوە بەڵگە و دۆکیۆمێنتی زۆری تێدایە و تێوەگلانی هەورامی لەو دۆسیەیەدا دەسەلمێنێت و ئەوەش ئاشتی هەورامی ناچار دەکات بە بارزانی بڵێت هێشتا دۆسیەکە کۆتایی نەهاتووە و پێدەچێت لەسەر ئەم دۆسیەیە حکومەتی هەرێم بڕی 1 ملیار و 600 ملیۆن دینار سەرەڕای تێچووی دادگا و دۆسیەکە بدات. 

تۆماکردنی ئەو سکاڵایە لەکاتێکدایە، ئاشتی هەورامی کە وەزیری پێشووی  سامانە سروشتیەکان بوو لە کابینەی هەشتەم، ئێستا لە کابینەی نۆیەمی حکومەتی هەرێمدا، کراوە بە ڕاوێژکاری سەرۆکی حکومەتی هەرێمی کوردستان بۆ کاروباری وزە.



ئه‌م بابه‌ته   ‌ جار خوێندراوه‌ته‌وه‌
2019-12-01
زیاتر...
123
سەرەکی  |   دەربارە  |   پەیوەندی  |  
Telerik For IT Solution

© Copyright 2018 ZEDNEWS. All Rights Reserved.

         E-Mail: [email protected]