سەردێڕ:
سەرەکی  |   دەربارە  |   پەیوەندی  |  
زێدنیوز
کوردستان

نەوەی نوێ هۆشداری دەدات: تا سەر دۆخی کوردستان وا بەبێدەنگیی نامێنێتەوە

زێد نیوز:

ئەنجومەنی سیاسی جوڵانەوەی نەوەی نوێ هۆشداری بە حکومەتی هەرێم و پارتی و یەکێتی دەدات، ئەگەر چاکسازی نەکەن و چارەسەرێک بۆ کێشەکانی هاووڵاتیان نەدۆزنەوە، ئەوا خۆپیشاندانەکانی عێراق بۆ هەرێمیش دەگوازرێتەوە.


لە ڕاگەیەندراوێکدا ئەنجومەنی سیاسی جوڵانەوەی نوێ لەبارەی دۆخی هەرێمی کوردستان ڕایگەیاند "ئەو هۆکار و کێشانەی چەند ڕۆژێکە هاووڵاتیانی هەرێم بۆی ڕژاونەتە سەر شەقامەکان، سەرجەمیان لە هەرێمی کوردستاندا بوونیان هەیە، سەرباری دواکەوتنی مووچە و بوونی پاشەکەوتی مووچە کە لە باشوور و ناوەڕاستی عێراقدا بوونیان نییە".

نەوەی نوێ داوایکردووە، دەسەڵاتدارانی هەرێمی کوردستان وەک چاودێر تەماشای دۆخەکە نەکەن، چونکە بەشێکی زۆری ئەو هۆکارانە لەکوردستانیشدا بوونیان هەیە و ئەگەر چارەسەری ریشەیی نەدۆزرێتەوە ئەوا بە دڵنیاییەوە پریشکی ئەو ڕووداوانە بۆ هەرێمی کوردستانیش دەگوازرێنەوە.

لە ڕاگەیەندراوەکەدا ئەوەخراوەتەڕوو، لەو سۆنگەیەوە پێویستە دەسەڵاتدارانی هەرێمی کوردستان بەرپرسیارانە لەگەڵ ئەو دۆخەی عێراقدا مامەڵە بکەن و لە هەرێمی کوردستاندا کۆمەڵێک هەنگاوی جدی بنێن بۆ چارەسەری چەند قەیرانێکی قوڵ، خۆ ئەگەر ئەو داواکارییانەی خوارەوە جێبەجێ نەکرێن و حکومەت کاری جدی نەکات لەژێر چاودێریی ئۆپۆزسیۆندا، ئەوە لە داهاتوودا دڵنیابن هاوڵاتییان خۆیان هەڵوێست وەردەگرن و تا سەر دۆخی کوردستان وا بەبێدەنگیی نامێنێتەوە و خەڵک بێدەنگ نابێت لە داواکردنی مافی خۆی.

نەوەی نوێ جەختیشیکردووەتەوە، ئەو کاتەی پریشکی روداوەکانی بەغداد دەگەنە هەرێمی کوردستان ئەوا جوڵانەوەکەیان هەڵوێستی دیکەی دەبێت و لەپاڵ خەڵکدا دەبێت.

 نەوەی نوێ داوای ئەنجامدانی چەند چاکسازییەکی بەپەلەی کردووە کە ئەمانەن: 

١- بەشەفافیی مامەڵە بکرێت لەگەڵ دەستکەوتی نەوت وگاز و سەرچاوەکانی تری دارایی، لیژنەی هاوبەشی ئۆپۆزسیۆن و دەسەڵات درووست بکرێت و دەستبەجێ داهات و بڕی هەناردەی راستەقینەی نەوت و خاڵە سنووریەکان و داهاتی ناوخۆ بخرێتە بەردەستی ئەو لیژنەیە و ئاشکرا بکرێت.

٢- چارەسەرێکی گونجاو بۆ ئەو هەموو ڕێژەی بێکارییە بدۆزرێتەوە کە ئێستا لەنێو گەنجاندا هەیە و جگە لە گرنگییدانی کەرتی گشتیی بەم بابەتە، ئەوە کەرتی تایبەت بە رۆڵی خۆی هەستێت و دەستی دوو حیزبی دەسەڵاتداری لێ دوربخرێتەوە.

٣-دانانی کاتێکی دیاریکراو بۆ گێڕانەوەی موچەی پاشەکەوتکراو، هەروەها دانانی ئالیەت و دۆزینەوەی چارەسەر بۆ ئەو بابەتە.

٤- چارەسەرکردنی قەیرانی فەرمانبەری بندیوار و گێڕانەوەی ئەو بڕە پارەیە بۆ بواری خزمەتگوزاریی و ئاوەدانیی شار، قەزا، ناحیە و گوندەکان بە یەکسانیی بۆ هەموویان، نەک تەنها بۆ شارە گەورەکان.

٥- حکومەت بە پشت بەستن بە داواکاریی و پێشنیارەکانی نەوەی نوێ و هێزەکانی تری ئۆپۆزسیۆن، پرۆژەیەکی گەشەپێدانی هەمەلایەن ڕابگەیەنێت و لەم ڕێگەیەوە ئاستی گەشەو بژێوی هاوڵاتییان بەرزبکرێتەوە.

٦- دەرماڵەی خوێندکارانی زانکۆ و پەیمانگاکان بگەڕێندرێتەوە. 

٧-هێزی پێشمەرگەی کوردستان یەک بخرێتەوە، هێزێکی نیشتیمانیی کوردستانیی دابمەزرێندرێت و دامەزراوە ئەمنییەکانیەکانی تریش یەکبخرێنەوە و دەستبەجێ جێگۆڕکێ بە کەسی یەکەمی دامەزراوە ئەمنیەکانی شارەکان بکرێت. بە جۆرێک بەرێوبەری دەزگە ئەمنیەکانی سنوری سلێمانیی بگوازرێنەوە بۆ هەولێر و دهۆک و بە پێچەوانەشەوە.

٨-گرنگیەکی باش بدرێت بەکەرتەکانی پەروەردە و تەندروستیی، هەروەها باشکردنی ڕێگەوبانەکان وبودجەی پێویستیان بۆ دیاری بکرێت.

٩- پرۆژەیەکی باش و جدی، لەگەڵ خشتەی کات و پلانی راستەقینە بخرێتە ڕوو بۆ چارەسەری کێشەی کەم ئاویی و بێکارەبایی و کێشە خزمەتگوزارەییە پێویستەکان.


ئه‌م بابه‌ته   ‌ جار خوێندراوه‌ته‌وه‌
2019-11-03
زیاتر...
سەرەکی  |   دەربارە  |   پەیوەندی  |  
Telerik For IT Solution

© Copyright 2018 ZEDNEWS. All Rights Reserved.

         E-Mail: [email protected]