سەردێڕ:
سەرەکی  |   دەربارە  |   پەیوەندی  |  
زێدنیوز
کوردستان

نەوەی نوێ پێداویستی پزیشکی گەیاندە رۆژئاوای کوردستان

زێد نیوز:

فراکسیۆنی نەوەی نوێ لە پەرلەمانی کوردستان کۆمەڵێک پێداویستی پزیشکی گەیاندە ڕۆژئاوای کوردستان و هەرچەند ویستیشیان شاندێک بنێرنە ڕۆژئاوا بۆ هاوکاری پزیشکی، بەڵام لە دەروازەی نێوان هەرێم و ڕۆژئاوا ڕێگەیان پێنەدرا تێبپەڕن.


کازم فاروق، سەرۆکی فراکسیۆنی نەوەی نوێ لە لێدوانێکی تەلەفزیۆنیدا لە پردی سێمێلکای نێوان هەرێمی کوردستان و ڕۆژئاوای کوردستان ڕایگەیاند: "ئەمڕۆ وەک فراکسیۆنی نەوەی نوێ هاتینە ئێرە بۆ ئەوەی لەم دەروازە سنورییەوە هەندێک پێداویستی پزیشکی بگەیەنینە هاووڵاتیانی رۆژئاوای کوردستان و خۆشم ویستم وەک پزیشکێک بچمە ڕۆژئاوا و لە نەخۆشخانەکانی ئەوێ هاوکاری برینداران بکەم".

وتیشی، بەرپرسانی ئەو دەروازەیە ڕێگەیان نەداوە بچێتە ڕۆژئاوا و پێیان وتووە کەبەپێی ئەو ڕێنماییانەی پێیاندراوە، ناتوانێت بچێتە ئەوێ.

کازم فاروق ئاماژەی بەوەکرد: "هەرکاتێک ئەو دەروازەیە کرایەوە و ڕێگەدرا خەڵک پێیدا تێپەڕببێت، دەمانەوێت بە کرداری هاوکاری بکەین و تەنها قسە نەبێت و بچین لەوێ وەک پزیشک هاوکاری خوشک و براکانمان بکەین، ئەگەر تەنها ڕێگەمان بدەن ئێمە بەهەموو شێوەیەک ئامادەین".

سەرۆکی فراکسیۆنی نەوەی نوێ جەختیشیکردەوە، ئەوان چاوەڕوان بوون پەرلەمان بێتە سەرخەت و شاندێک ڕەوانە ڕۆژئاوا بکات، بەڵام پەرلەمان ئەو کارە ی نەکرد و هیچ ئاماژەیەکیش نییە ئەو کارە بکات.

کازم فاروق باسی لەوەشکرد، هەڵوێستی هەرسێ سەرۆکایەتییەکەی هەرێم لەو پرسەدا زۆر لاواز و شەرمنانە بووە و دەکرا هەڵوێست و کاری زۆر گەورەتریان بکردایە.



ئه‌م بابه‌ته   ‌ جار خوێندراوه‌ته‌وه‌
2019-10-28
زیاتر...
سەرەکی  |   دەربارە  |   پەیوەندی  |  
Telerik For IT Solution

© Copyright 2018 ZEDNEWS. All Rights Reserved.

         E-Mail: [email protected]