سەردێڕ:
سەرەکی  |   دەربارە  |   پەیوەندی  |  
زێدنیوز
کوردستان

شاسوار عەبدولواحید: پێویستە خۆپیشاندانەکانی عێراق بگەنە شارەکانی هەرێم

زێد نیوز:

شاسوار عەبدولواحید، سەرۆکی جوڵانەوەی نەوەی نوێ لەبارەی خۆپیشاندانەکانی بەغدا و شارەکانی تری عێراق راگەیەندراوێکی بڵاوکردەوە و بەپێویستیدەزانێت ئەو خۆپیشاندانانە بگەنە شارەکانی هەرێمی کوردستان.



شاسوار عەبدولواحید، سەرۆکی جوڵانەوەی نەوەی نوێ لە راگەیەندراوێکدا ئاماژە بەوە دەکات "هەموو ئەو گوزەران خراپی هاووڵاتیان و دزینی سەروەتی وڵات لەلایەن بەرپرسان و ناعەدالەتی و نەبوونی خزمەتگوزاری کە لە بەغداد و باشوری عێراق هاووڵاتییان باسی لێوە دەکەن، ئەوا لە هەرێمی کوردستان زۆر بەزیادەوە بوونی هەیە".

لەبارەی خراپی گوزەرانی هاووڵاتیانی کوردستان، سەرۆکی جوڵانەوەی نەوەی نوێ، روونیدەکاتەوە "لە هەرێمی کوردستان نەک ئەوانە هەن، بەڵکو مووچەی فەرمانبەرانیش نادەن و هاووڵاتییان و کاسبکارانی ناو بازاڕ لە دۆخێکی زۆر خراپدان".

دەشڵێت "گەنجانمان بێکارن و تەنها لە ساڵی 2014 تا ئێستا زیاد لە نیو ملیۆن گەنجی تەمەن 18 ساڵ تا 25 ساڵمان هەن کە بێکارن، وە نزیکەی 200 هەزار گەنجی دەرچووی زانکۆ و پەیمانگاکان بێکارن و دانەمەزراوون و نازانن داهاتویان بە کوێ دەگات".

سەرۆکی جوڵانەوەی نەوەی نوێ لە راگەیەندراوەکەیدا ئاماژە بەوە دەکات "ژنان و کچانمان بێکارن و لە ماڵەوە فەرامۆش کراوون و هیچ هەلێکی کار یان ستراتیژێک نییە بۆ خزمەتی ژنان".

شاسوار عەبدولواحید روونیدەکاتەوە، کوردستان بێ ساحیبە و ئەوەی هەیە ئەوەیە کە هەر بەرپرسە و دەستی گرتوە بەسەر بازرگانی و بزنسێکدا و قوتی میلەتیان گرتوە و خەریکی خۆیان و مناڵەکانیانن دەوڵەمەندیان کەن.

دەشڵێت "سلێمانی و هەولێر و دهۆک و هەڵەبجە بێ ساحێبن و سەرکردەی دڵسۆزیان نییە و کەسیش نازانیت کێ لە خەمی ئەم شارانە و هاووڵاتیانی ئەم شارانەن".

لەبارەی کەرکوکیشەوە، شاسوار عەبدولواحید ئاماژە بەوە دەکات"کەرکوک نەک وێران کراوە و بە جێهێڵدراوە، بەڵکو ئێستاش دوو حیزبی دەسەڵاتدار تەنها لە خەمی نەوتی کەرکوکن و بیر لەوە دەکەنەوە کە چۆن بای حەسەن و هاڤانایان دێتەوە دەست تا نەوتەکەی بەرن.نەک بیر لەوە بکەنەوە کە چۆن خەڵکی کەرکوک دڵخۆش بکەن".

سەرۆکی جوڵانەوەی نەوەی نوێ دەپرسێت "ئایا ئەگەر ئێستا خەڵک رانەپەڕێت و نارەزایەتی دەرنەبڕێت و داوای مافی خۆی نەکات، ئەوا کەی دەیکات؟".

شاسوار عەبدولواحید، سەرۆکی جوڵانەوەی نەوەی نوێ ئامادەیی خۆشی دەردەبڕێت بۆ ئەوەی لەگەڵ خۆپیشاندەران بێتە سەر شەقام و داوای مافی خەڵکی بەشخوراو بکات. 

دەقی راگەیەندراوەکەی شاسوار عەبدولواحید: 

پێویستە خۆپیشاندانەکانی ناوەراست و باشوری عێراق بگەنە هەولێر و سلێمانی و دهۆک و هەڵەبجە:


هەمو ئەو گوزەران خراپی هاوڵاتیان و دزینی سەروەتی وڵات لە لایەن بەرپرسان و ناعەدالەتی و نەبونی خزمەتگوزاری کە لە بەغداد و باشوری عێراق هاوڵاتییان باسی لێوە دەکەن، ئەوا لە هەرێمی کوردستان زۆر بەزیادەوە بونی هەیە.

لە هەرێمی کوردستان نەک ئەوانە هەن، بەڵکو موچەی فەرمانبەرانیش نادەن و هاوڵاتییان و کاسبکارانی ناو بازار لە دۆخێکی زۆر خراپدان.

گەنجانمان بێ کارن و تەنها لە ساڵی ٢٠١٤ تا ئێستا زیاد لە نیو ملیۆن گەنجی تەمەن ١٨ سال تا ٢٥ ساڵمان هەن کە بێکارن، وە نزیکەی ٢٠٠ هەزار گەنجی دەرچوی زانکۆ و پەیمانگاکان بێ کارن و دانەمەزراون و نازانن داهاتویان بە کوێ دەگات.

ژنان و کچانمان بێ کارن و لە ماڵەوە فەرامۆش کراون و هیچ هەلێکی کار یان ستراتیژێک نییە بۆ خزمەتی ژنان.

کوردستان بێ ساحیبە و ئەوەی هەیە ئەوەیە کە هەر بەرپرسە و دەستی گرتوە بەسەر بازرگانی و بزنسێکدا و قوتی میلەتیان گرتوە و خەری خۆیان و مناڵەکانیانن دەوڵەمەندیان کەن.

سلێمانی و هەولێر و دهۆک و هەڵەبجە بێ ساحیبن و سەرکردەی دڵسۆزیان نییە و کەسیش نازانیت کێ لە خەمی ئەم شارانە و هاولاتیانی ئەم شارانەن.

کەرکوک نەک وێران کراوە و بە جێهێڵدراوە، بەلکو ئێیستاش دوو حیزنی دەسەلاتدار تەنها لە خەمی نەوتی کەرکوکن و بیر لەوە دەکەنەوە کە چۆن بای حەسەن و هاڤانایان دێتەوە دەستتا نەوتەکەی بەرن.نەک بیر لەوە بکەنەوە کە چۆن خەلکی کەرکوک دڵخۆش بکەن.


چەند بنەمالەیەکی سیاسی فەرمانڕەوا، تەنها ئەوە ماوە بینە ناو ماڵی هاولاتییان و ناومالەکانیان بدزن، دەنا هیچ نەماوە نەیکەن.


ئایا ئەگەر ئێستا خەلک رانەپەڕێت و نارەزایەتی دەرنەبڕێت و داوای مافی خۆی نەکات، ئەوا کەی دەیکات؟

من بەش بە حالی خۆم لەگەڵتانم ، وە ئامادەم خۆم لەگەلتان بێمە سەر شەقام و داوای مافی خەلکی بەشخوراوی وڵاتەکەمان بکەین.

دەبێت هەمومان پێکەوە باوەڕمان بە خۆمان هەبێت و باوەڕمان بە یەکتر هەبیت و پێکەوە دەست و پشتی یەک بگرین.

دەبێت مامۆستا و كاسبکار، فەرمانبەر و دانەمزراو، چینی هەژار و مام ناوەند، رۆشنبیر و هاوڵاتی ئاسایی، هەموو پێکەوە پشتی یەک بگرن و پێکەوە هەمومان بێینە سەر شەقام.

پارتی و یەکێتی پێیان وایە میلەت هیج ناکەن و خەلک نارەزایی دەرنابڕێت. بەلام تەنها چونمان بۆ سەر شەقامەکان و دانیشتنمان لەسەر جادە، پەیامێکی زۆر رونە بۆ دەسەڵات و گۆڕانکاری گەورە بە دوای خۆیدا دەهێنێت.


منداڵەکانمان سبەی لێنان دەپرسن کە ئاخۆ چینان کردوە بۆ ئەوەی داهاتوی ئەوان خۆش بکەین؟ ئاخۆ هەلوێستمان چی بووە لە ئاست ئەوم هەموو زوڵمەی دو حیزبی فەرمانڕەوا؟

هیوادارم ئەو کاتەی کە تەمەنمان تێدەپەڕێت، وەڵامێکی گونجاومان پێ بێت بۆ ئەوان.
شاسوار عەبدولواحید 



ئه‌م بابه‌ته   ‌ جار خوێندراوه‌ته‌وه‌
2019-10-02
زیاتر...
سەرەکی  |   دەربارە  |   پەیوەندی  |  
Telerik For IT Solution

© Copyright 2018 ZEDNEWS. All Rights Reserved.

         E-Mail: [email protected]