سەردێڕ:
سەرەکی  |   دەربارە  |   پەیوەندی  |  
زێدنیوز
جۆراوجۆر

هەولێر پێشوازی لە (هێنریک ئیپسن) دەکات

زێد نیوز:

شاکارێکی شانۆیی نووسەری جیهانیی (هینریک ئیبسن ١٨٢٨ - ١٩٠٦) کە بە باوکی شانۆی ریالیزمی دادەنرێت بۆ یەکەمین جارلە شاری هەولێر کاری دەرهێنانی بۆ دەکرێت ئەویش شانۆگەریی (دوژمنی گەل)ە، لەم شانۆگەریەدا کە ژمارەیەکی فراوانی بەشدارانی لەخۆ گرتووە دەستەیەک لە شانۆکارە گەنجەکانی شاری هەولێر رۆڵەکان بەرجەستە دەکەن و کارە هونەرییەکان رادەپەڕێنن


سەبارەت بەم نمایشە دەرهێنەری کورد ئەرسەلان دەروێش، دەڵێت: شانۆگەری (دوژمنی گەل)کە لەساڵی ١٨٨٢دا بڵاوبووەتەوە لە رێگای بابەتی پیسبوونی ئاوی شارێکی باکوری رۆژهەڵاتی نەرویژەوە، پرسی نغرۆبوونی ویژدانی خەڵک لە نێو زەلکاوی بەدمۆڕاڵی و پشت لە راستیکردن و ملدان بۆ ستەم وچەواشەکاریی دەسەڵاتداران دەخاتە روو. (ئیبسن) لەم شاکارەیدا بوێرانە پەردە لەسەر دیاردەی گەندەڵی هەڵدەماڵێ و بانگەشە بۆ زەروورەتی بەرپەرچدانەوەی دەکات ئەگەر بە شێوەیەکی تاکەکەسیش بێت! تا ئەوئاقارە دەڕوات کە بڵێت : (بەهێزترین مرۆڤ لە جیهاندا، ئەو کەسەیە کە بەتەنها دەجەنگێت)، ئێمەش لە میانەی بایەخدان بە کەلتووری شانۆی جیهانیی ، نەخاسمە ئەو تێکستانەی کە بەرکەوتنی لەگەڵ واقیعی ژیانی کۆمەڵایەتی و ئابووری و رامیاریی کۆمەڵگاکەماندا هەیە، پێمان پەسەند بوو وەک (تیپێ شانۆی سالار) ئەم کارە کە چەندین جار پێشتر لە کوردستاندا نمایشکراوە لە شاری هەولێری پایتەختدا بە پشتیوانی (بەڕێوەبەرایەتی هونەری شانۆ)ی سەر بە بەڕێوەبەرایەتی گشتی رۆشنبیری هەولێر لە  وەزارەتی رۆشنبیریی و لاوان پێشکەش بکەین.


 لەم دەرفەتەدا وێرای سپاس بۆ ئەو پشتیوانییەی (بەڕێوەبەرایەتی هونەری  شانۆی هەولێر)سپاسی تەواوی ستافی بەشدار بوو دەکەم کە لە هەلومەرجێکی یەکجار سەختدا بەهۆی نەبوونی هۆڵی شانۆیی شایستە لە شارەکەداو ئاریشەگەلێکی زۆر بۆ ئەم جۆرە کارە گەورانە ، خۆنەویستانە ئەم بەرهەمەیان سەرپێ خستووە بۆ بەر دیدەی بینەرانی ئازیز..


هەروەها جێی خۆیەتی سوپاسی( دامەزراوەی میدیایی کوردستان24) بکەم کە سپۆنسەریی میدیایی شانۆگەریەکەمان دەکات و (پەیمانگای هونەرەەکانی هەولێر)و بەشی شانۆبۆ تەرخانکردنی هۆڵی رەوانشاد (مامۆستا فەرهاد شەریف) بۆ کارەکەمان. بەو هیوایەین کە بینەرانی ئازیزو خامە ماندووکانی بواری نووسینی هونەریی بایەخ بەم هەوڵە خاکەڕایەمان بدەن  بەئامادەبوونیان و بەشداریکردنیان لە نمایشی (دوژمنی گەل)دا.


جێگەی باسە شانۆگەری (دوژمنی گەل) یەکێک لە بەناوبانگترین دەقەکانی نووسەری نەروێژی مەزن (هینریک ئیپسن) ،لەم کارەدا دەستەیەک لە شانۆکارە گەنجە ئەکادیمییەکان بەشداری تێدا دەکەن و کارە هونەرییەکانی ڕادەپەڕێنن ، رۆڵە سەرەکییەکان لەلایەن هونەرمەندان ( بەهمەن حاجی، مەولان حەمەدەمین ، محەمەد تاهیر، یاسین ئیبراهیم عومەر، سیما مستەفا، زیاد کەریم، وەیلان سدیق، یوسف یوسفی) بەرجەستە دەکرێت. 

هەروەها کۆمەڵێک ئەکتەری تربەشدارن لەوانە(زەهرە نەجات، هۆزان کاروان، نەورۆز عەلی کەمال، بنیاد فەرحان، دیمەن تاهیر، هاوکار خدر، محەمەد حەمە، شەنیارمحەمەد ، عەلی کەمال، گەرمیان گلی ، باوان کەیفی ، یارا ئەرسەلان ، رەهێڵ هەورامان) هەروەها هونەرمەندان (دانا محەمەد وەک یاریدەدەری دەرهێنەر ، کۆمەڵێک بەهرەی تازە دەرکەوتوو کارە هونەرییەکانی (دیکۆر و روناکی و موزیک و دەنگ ) ئەنجام دەدرێت ، پەیمانگای هونەرەجوانەکانی هەولێریش بەهۆڵە شانۆییەکەی(فه رهاد شه ریف) پشتیوانی کارەکە دەکات و نووسەرو هونەرمەندی دوورە وڵات (هاودەم ساڵح جاف) لە نەرویژییەوە دەقەکەی وەرگێڕاوەتە سەر زمانی شیرینی کوردی. بڕیارە لە رێکەوتی ٩ی ئەیلوولەوە رۆژانە کاتژمێر ٥ی ئێوارە لە پەیمانگای هونەرە جوانەکانی هەولێر نمایش بکرێت.



ئه‌م بابه‌ته   ‌ جار خوێندراوه‌ته‌وه‌
2019-08-24
زیاتر...
سەرەکی  |   دەربارە  |   پەیوەندی  |  
Telerik For IT Solution

© Copyright 2018 ZEDNEWS. All Rights Reserved.

         E-Mail: [email protected]