سەردێڕ:
زێدنیوز
جیهان

بەرنامەیەكی ڕادیۆیی بۆ دۆخی پەنابەران لە كەمپەكانی دەرەوەی ئوسترالیا تەرخانكرا

زێد نیوز:

زنجیرە بەرنامەی ڕادیۆییی "زەتەیك"ی كەناڵی ئەلجەزیرەی ئینگلیزی كە لەسەر ماڵپەری ئەو كەناڵە بڵاودەكرێتەوە، ئەڵقەیەكی ئەو بەرنامەیەی تایبەت كرد بە باسكردنی سیاسەتی كۆچی ئوسترالیا كە تێیدا باسیشی لە هەلومەرجی خراپی كەمپەكانی دەرەوەی ئوسترالیا لە دوورگەكانی ناورۆ و پاپانیوگینیا كردووە.

لەو ئەڵقەیەی بەرنامەكەدا، باس لەوە كراوە كە ئوسترالیا خاوەنی توندترین ڕێوشوێنە لە بەرامبەر كۆچبەرانی دەریایی قاچاخدا بەجۆرێك كە دیپۆرتیان دەكاتەوە و سەدان پەنابەری تریش لە كەمپەكانی دوورگەكان ماوەی چەندین ساڵە بەبێ‌ بوونی وادەیەكی دیاریكراو لەو كەمپانەدا دەستبەسەرن. 

هاوكات بەرنامەكە چاوپێكەوتنی لەگەڵ پزیشكێكیشدا كردووە كە پێشتر لە كەمپەكانی دوورگەی ناورۆ كاری كردووە لەگەڵ ئەو پەنابەرانە. ئەو پزیشكە بە بەرنامەكەی ڕاگەیاندووە كە خزمەتگوزارییەكان لەو كەمپانەدا زۆر سەرەتایی بوون و لە ئاست پێویستدا نەبوون بەجۆرێك كە وەك بەندیخانە گوزارشتی لێكردوون.

لەبارەی دۆخی دەروونی پەنابەرانیشەوە، ئەو پزیشكە بە بەرنامەكەی ڕاگەیاندووە كە دۆخی دەروونی ئەو پەنابەرانە بەهۆی زۆری مانەوەیان لەو دوورگانە و نەبوونی هیوایەك بۆ داهاتوو ، تووشی خەمۆكی بوون و بەگووتەی ئەو، كاری ئەوان ئەوەبووە كە بتوانن ئەو پەنابەرانە بوەستێنن لە پەنابردن بۆ خۆكوشتن.  

پەنابەرانی دوورگەی ناورۆ و پاپانیوگینیا هەرگیز لە ئوسترالیا نیشتەجێ‌ ناكرێن چونكە پێشتر ویستویانە بە قاچاخ و بە بەلەم ڕوو لە ئوسترالیا بكەن. 

سەرچاوە : 

ماڵپەری ئەلجەزیرەی ئینگلیزی 



ئه‌م بابه‌ته   ‌ جار خوێندراوه‌ته‌وه‌
2019-06-22
زیاتر...


Telerik For IT Solution

© Copyright 2018 ZEDNEWS. All Rights Reserved.

         E-Mail: [email protected]