سەردێڕ:
زێدنیوز
کوردستان

كوڕێكی شەوكەوت حاجی موشیر رەخنە لە رێكخەرانی فێستیڤاڵی ئێل بەگی جاف دەگرێت

زێد نیوز:

ئامانج شەوكەوت حاجی موشیر رەخنە لە رێكخەرانی فێستیڤاڵی ئێل بەگی جاف دەگرێت و دەڵێت "موزایەدە بە خوێنی باوكی شەهیدمەوە مەكەن".

لە نووسینێكدا كە لە هەژماری فەرمی خۆی لە فەیسبووك بڵاوی كردۆتەوە، ئامانج شەوكەت حاجی موشیر ئاماژە بەوە دەكات كە چیتر ناكرێت بێدەنگ بێت بەرامبەر بە "ناهەقی"یەك كە دەرهەق بە باوكی شەهیدی و خانەوادەكەی دەكرێت. 

لەنووسینەكەدا دەڵێت "بەدەر لەو بنەما بەها كۆمەڵایەتی و عەشایەریانەی كە لە ئەساسدا ڤیستیڤاڵی جافی لەسەر بنیاتنرا لە ئێستادا ئەم ڤیستیڤاڵە كراوە بە ئامرازێك بۆ مەرامی شەخسی و سیاسی بەجۆرێك كەناوی عائیلەو بنەماڵەی ئێمە بەكار ئەهێنرێت بۆ كۆكردنەوە و بانگێشتكردنی خەڵك بۆ فیستیڤاڵەكە، لەكاتێكا خێزانی شەهید شەوكەت دواهەمین كەسە كە لە ئەنجامدانی ئەم بۆنەیە ئاگادارە". 

روونیشیدەكاتەوە "ڕێكخەرانی ئەم فیستیڤاڵە بۆ رێزگرتن لەباوكم گوایە بەتەمان سبەی پەردە لە سەر وێنەیەكی لابدەن، بەڵام لە راستیدا ئەم ڕێزگرتنە تەنهابۆ مەرامی سیاسی و بەرژەوەندی شەخسی خۆیان و بەكارهێنانی ناوی باوكمە. ئەمانە كەسانێكن كە دەمێكە سیاسەتێكی ناپاك بەكاردێنن بۆ بەرزكردنەوەی پێگەی سیاسی و كۆمەڵایەتی ولە هەمانكاتدا خۆ دەوڵەمەندكردنیان لەلایەن دەسەلاتەوە، ئەو سیاسەتەش تەنها بە "موزایدە بە خوێنی شەهیدەوە" وەسفدەكرێت."


دەقی نووسینەكەی ئامانج شەوكەوت حاجی موشیر: 

موزایەدە بە خوێنی باوكی شەهیدمەوە مەكەن !!

بۆ ڕای گشتی و بەتایبەتی بۆ سەرۆك هۆز و تیرە و پیاو ماعقوڵانی ئێل بەگی جاف.

من وەك ئامانجی شەهید شەوكەتی حاجی موشیر دەمەوێت بەم پەیامە ڕاو سەرنجی تایبەتی خۆم لەسەر ئەم ڤیستیڤاڵەی ئێل بەگی جاف، بۆ ڕای گشتی بڵاوبكەمەوە. چوونكە ناكرێت لەوە زیاتر بێدەنگبم بەرامبەر ناحەقیەك كە دەرحەق بە باوكی شەهیدم و خانەوادەكەم دەكرێت. دوای ١٦ ساڵ بێدەنگی ئەمڕۆ ئەڵیم ئیتر بەسە! موزایەدە بە خوێنی باوكی شەهیدمەوە مەكەن!

بەدەر لەو بنەما بەها كۆمەڵایەتی و عەشایەریانەی كە لە ئەساسدا ڤیستیڤاڵی جافی لەسەر بنیاتنرا لە ئێستادا ئەم ڤیستیڤاڵە كراوە بە ئامرازێك بۆ مەرامی شەخسی و سیاسی بەجۆرێك كەناوی عائیلەو بنەماڵەی ئێمە بەكار ئەهێنرێت بۆ كۆكردنەوە و بانگێشتكردنی خەڵك بۆ فیستیڤاڵەكە، لەكاتێكا خێزانی شەهید شەوكەت دواهەمین كەسە كە لە ئەنجامدانی ئەم بۆنەیە ئاگادارە.

ڕێكخەرانی ئەم فیستیڤاڵە بۆ رێزگرتن لەباوكم گوایە بەتەمان سبەی پەردە لە سەر وێنەیەكی لابدەن، بەڵام لە راستیدا ئەم ڕێزگرتنە تەنهابۆ مەرامی سیاسی و بەرژەوەندی شەخسی خۆیان و بەكارهێنانی ناوی باوكمە. ئەمانە كەسانێكن كە دەمێكە سیاسەتێكی ناپاك بەكاردێنن بۆ بەرزكردنەوەی پێگەی سیاسی و كۆمەڵایەتی ولە هەمانكاتدا خۆ دەوڵەمەندكردنیان لەلایەن دەسەلاتەوە، ئەو سیاسەتەش تەنها بە "موزایدە بە خوێنی شەهیدەوە" وەسفدەكرێت.

من دەمەوێت بپرسم ئایا ئەو كەسانە كە خۆیان كردوەتە دڵسۆزی شەهید شەوكەتی حاجی موشیر، خێرە تەنها لە بۆنە سیاسیەكان و ساڵیاد و فیستیڤاڵەكاندا شەهید شەوكەتیان بیردەكەوێتەوە؟

ئەی ئەگەر ئەوەنە دڵسۆزن بۆ چی لەپاش ١٦ ساڵ دوای شەهیدبونی پێتان قورسە یەك جار بێنە سەردانی خانەوادەكەی شەهید شەوكەت؟

ئەی ئەم دلسۆزانە لە كوێبون كاتێك ڕێك بەدوای شەهیدبوونی باوكمدا خێزانەكەی كرایە كرێچی لە كوردستاندا و بە حیزبێكی زەبەلاحەوە، نەیانتوانی ماف و موستەحقاتی خانەوادەكەم بپارێزن؟

ئەی ئەم دڵسۆزە بەڕێزانە لە كوێ بون كە كەمتر لە ٨ مانگ لەمەوپێش لە هەڵبژاردنی پەرلەمانی كوردستاندا كورسی كوڕەكەی دزرا ( كە بە حەقی خۆی بە دەستی هێنا) لە لایەن ئەو حیزبە بێ باك و بێمنەتە كە بە خوێنی شەهید شەوكەت و هەزاراهان شەهیدی بەشەرەفی وەك ئەو دروستكرا؟

١٦ ساڵە بێدەنگیم هەڵبژاردوە لە بەر رێز و هەستی خانەوادەكەم و بەتایبەتی دایكی غەدرلێكراو كە هەمیشە سەبر و خۆڕاگری هەڵبژارودە، تەنانەت كە گەورەترین غەدری شەخسیم بەرامبەر كرا هەر بێدەنگیم هەڵبژارد.

بەڵام لەوە زیاتر قبوڵم نیە! چوونكە دیارە بێدەنگی ئێمە وای كردوە كەسانێك بێ شەرم و بێ باك كەی ویستیان ناوی باوكم بەكاردێنن بۆ خۆزل كردن و خۆ دەوڵەمەنكردن وەكو وابێت ناوی شەهید شەوكەت وەسیلە و ئامرازێكی باش بێت بۆ خۆ گەورەكردن.

لە كۆتادا دەربارەی ئەم فیستیڤاڵە دەڵێم، نە بۆ ئیل بەگی جاف دەكرێت، نە بۆ زیندوكرنەوەی هیچ بەهایەكی كۆمەڵایەتی، نە بۆ رێزگرتن لە ناوی باوكم دەكرێت. تەنها بۆ مەسڵەحتی شەخسی و سیاسی هەندێك كەس دەكرێت. لەبەر ئەوە نە بەشداری تیا ئەكەم و هەر كەسێكیش بەشداری بكات لەم كارە درۆینە تەنها شەرعیەت دەدەن بە سیاسەتێكی چەواشەكار كە موزایدە بە خوێنی شەهیدەوە دەكات!

ئامانج شەوكەت حاجی موشیر



ئه‌م بابه‌ته   ‌ جار خوێندراوه‌ته‌وه‌
2019-04-27
زیاتر...
Telerik For IT Solution

© Copyright 2018 ZEDNEWS. All Rights Reserved.

         E-Mail: [email protected]