سەردێڕ:
سەرەکی  |   دەربارە  |   پەیوەندی  |  
زێدنیوز
وتار

یاداشتی ١٤ پەرلەمانتارەكەی كوردستان

مه‌م بورهان قانع
ئەو ١٤ پەرلەمانتارەی ھەرسێ فراکسیۆنی "نەوەی نوێ" و "یەکگرتوی ئیسلامیی کوردستان" و "کۆمەڵی ئیسلامیی کوردستان"، کە رۆژی ١٠ی ئەم مانگە و پاڵپشت بە مادەی (٦٦)، بڕگەی "یەکەم" لە پەیڕەوی ناوخۆی پەرلەمانی کوردستان، لەرێی منەوە ئیمزاکانیان کۆکرانەوە و سەرەنجام یاداشتێکمان ئاڕاستەی دەستەی سەرۆکایەتیی پەرلەمانی کوردستان کرد، بۆ ئەوەی پاڵپشت بە بڕگە و مادەی ناوبراوی پەیڕەوەکە، گفتوگۆیەک لەنێوان پەرلەمان و حکومەتی ھەرێمدا بکەین و تایبەت بێت بە  پرسی دیاریکردنی میکانیزمێک بۆ گەڕاندنەوەی پاشەکەوتی موچەی موچەخۆرانی ھەرێمی کوردستان و ھەروەھا دانەوەی قەرزەکانی حکومەت لە چوارچێوەی ئەو پاشەکەوتە کەڵەکەبوانەدا، بانگێشتەکەمان بۆ ئەو گفتوگۆیە، بۆئەوەیە پەرلەمان لەگەڵ سەرۆکی حکومەت و تیمە داراییەکەی دا کۆببێتەوە، نەک بە تەنھا کۆبوونەوە لەگەڵ وەزیری دارایی دا. وەک چۆن بڕیاری پاشەکەوتکردنی موچە، لەلایەن سەرۆکی ئەم کابینەیەی حکومەتەوە بووە، نەک وەزیری دارایی

بە پێی بڕگەی "سێیەم" لە مادەی (٦٦)ی پەیڕەوی ناوخۆی پەرلەمانی کوردستان، دەبێت "دەستەی سەرۆکایەتیی پەرلەمان"، لە ماوەیەک دا، کە لە ١٤رۆژ تێپەڕنەکات، وادەی ئەو دانیشتنە دیاریبکات.

بەپێی بڕگەی "شەشەم"ی ھەمان مادە، "حکومەت دەتوانێت داوای دواخستنی ئەو دانیشتنە بکات، بۆ ماوەیەک کە لە حەوت رۆژ زیاتر نەبێت و  بەھەماھەنگیی لەگەڵ دەستەی سەرۆکایەتیی دا، رۆژێکی دیکە دیاریدەکرێت".

واتە بەپێی پەیڕەوی ناوخۆی پەرلەمان، ئەم دانیشتنەی پەرلەمان لەگەڵ حکومەتدا، دەبێت ئەوپەڕی وادەی دواکەوتنی ئەنجامدانی، (١)ی مانگی داھاتوو بێت.

دەبێت لەو دانیشتنە تایبەتەی پەرلەماندا لەگەڵ حکومەت، وردەکاریی پرسی پاشەکەوتی موچە لەنێوان ھەردوو دەسەڵاتی یاسادانان و راپەڕاندن دا، گفتوگۆی لەبارەوە بکرێت و ئێمەی پەرلەمانتارانیش، کە ئیمزامان کردووە، لە نزیکەوە چاودێریی ئەو ھاتنەی تیمەکەی حکومەتی ھەرێم دەکەین و پرسیاری جەوھەریشمان ئەوەیە: ئەم کابینەیەی حکومەت، پاڵپشت بە چ دەقێکی قانونیی، بڕیاری پاشەکەوتکردنی موچەی موچەخۆرانی ھەرێمی کوردستانی داوە؟!

ئەوەش دەزانین ئەم کابینە حکومەتییە لەلایەن ئێمەی پەرلەمانتارانەوە متمانەی پێنەدراوە و ئێمەش دەسەڵاتی لێسەندنەوەی متمانەمان نییە لێی، بەڵام ئەنجامدانی گفتوگۆیەکی لەوجۆرە، کە تایبەت بێت بە پرسێکی گشتیی و بەرژەوەندیی گشتیی تێدابێت (وەک لە پەیڕەوی ناوخۆی پەرلەمانی کوردستاندا ھاتووە)، بەرپرسیارێتیی قانونیی و پیشەیی ھەردوو دەسەڵاتی یاسادانان و راپەڕاندنی ھەرێمی کوردستانە و ئومێدەوارین لە وادەی دیاریکراودا، دانیشتنەکە بکرێت و ھەمووان رێزی قانون بگرن و پابەندی پەیڕەوی ناوخۆی پەرلەمان ببن و سەرئەنجام بە خێر بۆ موچەخۆرانی ھەرێمی کوردستان بشکێتەوە.
4/13/2019 12:08:18 PM
بابەتەکانی تری نوسەر...
سەرەکی  |   دەربارە  |   پەیوەندی  |  
Telerik For IT Solution

© Copyright 2018 ZEDNEWS. All Rights Reserved.

         E-Mail: [email protected]